أنا راجل أمن، وشغلي طول عمري وسط الناس…
شفت جرائم، وشفت ضحايا، وشفت غفلة صغيرة كانت سبب في مصيبة كبيرة.
وعلشان كده بقولها بكل وضوح:
حماية الطفل مش مسئولية الشرطة ولا القانون…
حماية الطفل تبدأ من البيت.
المتحرش مش غريب… المتحرش “قريب من المكان”
خلوني أقولكم حقيقة يمكن تكون صادمة:
أخطر شخص على الطفل مش دايمًا الغريب اللي ما نعرفوش…
لكن اللي بيكون حواليه طول اليوم، واللي يعتبر جزء من البيئة اليومية:
عامل النظافة
فرد الأمن
الخادم أو المساعدة
البواب أو السايس
السائق
أي شخص يدخل البيت أو العمارة بصفة مستمرة
مش معنى كلامي إن كل الناس دي سيئة…
لكن خطورتهم في القرب والاختلاط اليومي،
وفي إن حضورهم جوه بيئة الطفل بيخلق “فرصة”…
والتحرش دايمًا يبدأ بفرصة.
ليه الخطر بيجي من الناس دي؟
لأنهم:
موجودين كتير في الأماكن الضيقة
معاهم مفتاح أو سلطة مكانية
الطفل شايفهم “طبيعيين” ومش بيخاف منهم
بيتواجدوا في وقت الأهل فيه مشغولين
وهنا تحصل المصيبة…
ثواني معدودة كفيلة تدمر طفل.
إزاي نحمي ولادنا؟
1— علّم ابنك جسمه ملكه
يفهم إن مفيش حد يلمسه… مهما كان.
دي أول نقطة أمان في حياة أي طفل.
2— خليك قريب من ابنك قبل ما تسيبه قرب حد
مش لازم تراقبه بعصبية، لكن بعين واعية.
الطفل اللي أهله حاطين عينهم عليه… محدش يقدر يقرب منه.
3— الأبواب المقفولة خطر
ممنوع يجلس طفل مع أي شخص لوحدهم…
باب مفتوح = أمان.
4— اسمع ابنك
لو قالك إن حد ضايقه…
ما تتجاهلش، وما تكسفوش، وما تخوّفوش.
اسمع… وصدّق… وتحرك.
5— مراقبة الأماكن المشتركة
مدخل العمارة، السلم، الجراج، الشقة، الأسنسير…
كلها أماكن بتحصل فيها أغلب حالات التحرش.
الكاميرات هنا مش رفاهية…
دي حماية لبيتك وطفلك.
6— الزيارة المفاجئة
ادخل فجأة وقت ما تتوقعش إنك هتدخل…
الناس بتبان على حقيقتها لما تكون فاكر نفسك مش راجع.
كلمة أخيرة… من راجل شاف كتير
أنا مش بكتب الكلام ده علشان أخوّفكم…
أنا بكتبه علشان أصحّيكم.
ولادكم محتاجين عين قوية…
أكتر من أي وقت فات.
المتحرش مش وحش في فيلم…
ده شخص بيدوّر على فرصة.
وإنت كأب وأم… لازم تكون دايمًا أقوى منه.
احموا ولادكم…
علشان محدش يقطع في قلوبكم.
