جريدة المجالس

عالمك الالكترونى لكل ما هو جديد معانا هتقدر تعرف كل الاخبار المحلية و الدولية من رياضية و سياسية و اقتصادية.

غير مصنف

صُنفت من أحسن ٢٠ لاعب في المحافظة بشهادة المدربين”

 كتب- سماح وجدي

بهذه الكلمات بدأ الشاب إبراهيم جرجس وشهرته “بوجبا” حديثه لجريدة المجالس المحلية   فهو من مواليد عام ٢٠٠١ محافظة أسيوط.

بدأت ازاي في المجال دا؟

في البدايه انا بحب لعب كرة القدم من طفولتي وتعلقت بها جدا، خصوصاً إني من أسرة كروية تعتز بإنتمائها للنادي الزمالك ،بدأت من سن ١٠ سنوات في أكاديمية كورة تحت قيادة مدرب الأجيال ك. جنيدي مصطفي،

جنيدي هو اللي خلاني ابدأ وظهر موهبتي ثم بدأت في مركز شباب بني مر لعبت موسمين ثم انتقلت انتقال حر لنادي شبان أسيوط لعبت للشبان ٤ سنوات ولعبت جميع مراحل الناشئين ولعبت درجة تالتة ودرجة رابعة وبعدها انضميت لمنتخب أسيوط وصُنفت من أحسن ٢٠ لاعب في المحافظة بشهاده المدربين.

نفسك توصل ل إيه في المجال دا؟

اتمني إني أكون لاعب كبير ومشهور وأنضم للنادي الزمالك، لأنه نادى عريق و أى لاعب يتمنى أنه يلعب فيه و يكون جزء من فريق الزمالك، وبعدها بتمني إني احترف خارج مصر.

مين أكتر حد كان بيشجعك؟ أهلي طبعا كانوا أكتر ناس بيشجعوني خصوصاً والدي كان دايما ف ضهري ودايما بيشجعني ويقولي اجتهد واتعب وربنا كبير وهيحققلك حلمك.

إيه المشاكل اللي كانت بتواجهك؟

ناس كتير كانت بتحاول تحبطني وتقلل من أحلامي ومعظم الناس يقولولي جملة “الكوره مش للمسيحين” كنت بستغربهم جدا لكن كلامهم كان أكبر حافز ليا إني أكمل وأخلي عندي أمل في ربنا.

هل أنت راضي عن اللي حققته؟

بالطبع انا راضى عن مستوايا و إن شاء الله اقدم ما فى وسعى و ابذل كل طاقتى لأقدم المزيد وإن شاء الله ربنا يوفقني وأوصل ل أكتر من كدا.

كلمة في نهاية لقائنا ؟

عاوز أقول إنه ضروري لكل شخص أنه يثق في نفسه وإنه يكون ليه هدف يحاول أكتر من مرة في الوصول ليه ومينفعش ييأس أبداً..

النجاح صعب لكن يستاهل،

اعمل كل اللي تقدر عليه في أي مكان تتحط فيه عشان تحقق هدفك وتكون عامل خطه لنفسك وعارف انت عاوز إيه وربنا هيفرحك أوي لأن دايما اختيارات ربنا لينا بتكون احسن مليون مره من اللي احنا عاوزينه.