جريدة المجالس

عالمك الالكترونى لكل ما هو جديد معانا هتقدر تعرف كل الاخبار المحلية و الدولية من رياضية و سياسية و اقتصادية.

أسرة و مجتمع

سألناهم: ترضى تتجوزى مخلوع؟ والإجابات بين “على حسب” و”هرفض طبعًا”

1120152921334694saltyin

40% من الفتيات يرفضن الارتباط برجل مخلوع”

حقيقة كشفتها إحصائيات مكاتب التسوية بمحكمة الأسرة من خلال الأخصائيين الاجتماعيين بمكاتبها، والتى تكشف أن الرجل أيضًا أحيانًا يحمل “وصمة” تجعل الفتيات تفر من الزواج به، وتجعل 60% من الرجال يخشون مكاشفة المجتمع بأنهم “مخلوعين” وفقًا للإحصائية نفسها، تمامًا مثلما تخشى الكثيرات من مواجهة المجتمع بحقيقة “طلاقها”.

هذه النتيجة دفعتنا لطرح السؤال على عدد من الفتيات “تعملى إيه لو اتقدم لك مخلوع؟” وإليكِ آرائهن..

“هرفض طبعًا بنسبة 99%” رد قاطع من “ماهيتاب أحمد”: “أولاً لأننى رأيت أكثر من حالة قريبة منى رفعت قضية خلع فشايفة التفاصيل وعارفة قد إيه الرجل المخلوع يهين نفسه عشان العند والفلوس، ثانيًا لو هو رجل محترم وعنده كرامة لما مراته تطلب الطلاق يطلقها بدل المرمطة فى المحاكم، بالتالى هو أكيد شخص مش سوى فى رأيى”.

أما “سوزانا بشير” فقالت “معنديش مشكلة، المهم فعلاً شخصيته وتفكيره، حتى مش عايزة أعرف السبب فى الخلع، أهم حاجة تكون هى خلاص ما بقتش جواه وأنا المطلوب إنى أخرجها وأتحمل تبعات مشاكلهم، يعنى شرطى الوحيد يكون متعافى من التجربة”.

وعبرت “ريهام منصور” عن رأى قريب منها فقالت: “مش هتفرق معايا لو إنسان كويس ومحترم، صحيح هقلق كتير لأن الست اللى تخلع جوزها أكيد ما شافتش شوية، فحاول أتأكد بكل شكل من سبب المشكلة، وبعدها أوافق أو أرفض لكن مش هرفض لمجرد الرفض”.

وبصراحة شديدة قالت “ريما مصطفى”: “الموضوع للوهلة الأولى يخض، وأول إجابة ممكن أقولها هى لأ، خاصة إن فكرة إن اللى كان متجوزها اتنازلت عن كل حاجة عشان تسيبه ممكن تقلق جدًا، لكن أرجع وأقول الأمر نسبى وممكن تتحدد الموافقة أو الرفض على حسب الشخص نفسه لكن مش هرفض من غير تفكير أو معرفة شخصية”.

فيما قالت “سمر جمال”: “ما عنديش مشاكل أنا اهتمامى إنى أكون بحبه وبيحبنى ونقدر نتعايش مع بعض فكريًا، وممكن الراجل المخلوع يكون أفضل كمان لأنه صاحب تجربة، لكن أكيد هحب أعرف سبب الانفصال، وأهم حاجة يكون راجل يقدر يكمل معايا رحلة الحياة، وفى ناس بتفضل الخلع كستات عشان الإجراءات تخلص بسرعة مش أكثر بس كلهم منفصلين فى النهاية”.

مستشارة أسرية: الأحكام المسبقة ظالمة

بدورها تقول المستشارة الأسرية سارة علاء الدين “غالبية البنات ترفض الفكرة لأن البنت بطبيعتها تبحث عن رجل يكون الأمان والسند وحلال مشاكلها، كما أن الكثير من الفتيات لديها مخاوف من الزواج قد تصل إلى فوبيا الزواج، بالتالى فكرة أنه مخلوع يعنى دفع زوجته إلى الوقوف فى المحاكم وتتنازل عن حقوقها المادية لتحصل على حريتها تثير الكثير من المخاوف لدى الفتاة وأسرتها وتشعر أنه “بتاع مشاكل” ولن يكون مصدر أمان لزوجته.

تضيف: “سبب آخر لرفض البنت هو خشية النظرة الاجتماعية السلبية لها وله، وتفكر لماذا خلعته زوجته؟ ولماذا تقبل برجل مخلوع؟ وتخشى من الضغوط الخارجية من الأشخاص الفضوليين خاصة أن الكثير من البنات لا تملك من الثقة بالنفس ما يجعلها تتجاهل كلام الناس.

ولكن فى رأيى الأحكام المسبقة ظالمة، ويجب ألا تأخذ البنت أى قرار قبل التعرف على الأسباب الحقيقية لانتهاء الزواج بالخلع وليس الطلاق، وتحاول التعرف على الأسباب من أكثر من طرف، وتهتم بمعرفة صفات الشخص نفسه وطباعه ثم تقرر.