الراسل / أسرة هيثم
الشاب الى فى الصورة ده اسمه هيثم عبد الجواد ابو سريع عنده 23 سنة مريض فى الرعاية المركزة بمعهد القلب القومي بامبابة .
هيثم كان بيمارس حياته بشكل طبيعي و عنده احلام و طموحات و كان طالب فى كلية الطب وبيجيب جيد جداً كل سنة و كان بيلعب تايكوندو و اخد مركز تالت فى بطولة الجمهورية2011 وكان دايماً مركز اول محافظة الجيزة .
حصل تغيير جذري فى حياته من 4 سنين و بعد ماكان هيبقي دكتور و بقي مريض طريح الفراش و بعد ما كان بطل ورياضي بقي حالته مثيرة للشفقة بجد والى بيكره يشوفها فى عين اي حد .
هيثم جاله مرض ” Hypercoagulable stateسرعة تجلط الدم ” وده جاب له جلطة فى رجله من بعدها حياته اتقلبت .
الجلطة الى فى رجله طلعت على الرئة وبعدها جاله جلطة فى القلب و المرض عمال يزيد معاه و حالته بتتدهور وبيلف على دكاترة حالته معروفة فى تشخيصها بس للأسف جسمه مش متقبل العلاج resistance اخد دوا اسمه ماريفان Marevan عشان ميحصلش جلطات فى جسمه مجبش نتيجه حتي لما الدكاترة زودوا الجرعة اكتر من 9 اضعاف !!
وبقي بيصاب كل شوية بجلطات فى اماكن مختلفة 3 مرات فى رجله و مرة فى قلبه و مرة فى المخ و حياته فى اخر 4 سنين بقت فى المستشفيات الى الدكاترة فيها بيقفوا قدام حالته مش عارفين لها حل !!
غير انه كان عنده ضيق فى الصمام الميترالى وغيره بعملية جراحية و للأسف حصل فيه انسداد بجلطة و اضطر يغيره تاني بعملية جراحية تاني والنهارده الصمام عليه جلطة جديدة ومحتاج يدخل جراحة و يتفتح صدره للمرة التالتة بجد حالته صعبة جداً وفى خطورة كبيرة على حياته .
هيثم من أسرة فقيرة ومحتاج مساعدتنا كلنا كان وهو فى عز مرضه بينزل يشتغل يقف فى صيدلية عشان يقدر يوفر تمن دوا مستورد غالى اسمه “زاليرتو” تمنه 600 جنيه واهله مكنوش قادرين يشتروه له وباعوا الى وراهم والى قدامهم ده غير انه عنده 4 اخوات و أمه عندها cancer وابوه متوفي واخوه مات بنفس المرض وحالتهم صعبة جداً .
لما دخل مستشفي القصر العيني 2013 هناك دكتور أمراض دم قاله انت عندك نقص فى بروتين c و بروتين s بعد ما اتعمل له تحاليل وفحوصات و هما دول سبب سرعة التجلط .
بس المشكلة ان عشان يعوضهم فى جسمه تمن الجرعة الواحدة اكتر من 86 الف جنيه وهو محتاج العلاج ده لمدة 6 شهور و دكتور تاني قاله علاجك فى ألمانيا مش فى مصر .
ورغم انه ساب الطب من سنتين بسبب المرض الا انه بيقول انه عنده امل يخف و يبقي دكتور قلب و نفسه يبقي بطل العالم فى التايكوندو زي مدربه كابتن تامر صلاح بطل العالم .
السؤال هنا اين مسئولي وزارة الصحة ؟ و اين وزارة التعليم العالي ؟ ﻻنه حتي اﻻن لا يزال طالب بكلية الطب .
أسرة هيثم تناشد الزعيم الرئيس عبد الفتاح السيسي للتدخل السفر للخارج للعلاج .
