بقلم / أدهم عادل ( بغداد )

السما حب..

الدين حب..

الناس حب..

الطين حب..

(يمتة صار الحب ذنب ؟!..)

يمتة صار الحب حرام؟!

آنة أحب كل النوارس و الحمام.. آ

ني أحب بنية سمرة وطفلة شگرة وناس فقرة من البرد تتغطة بالطين وتنام..

وذاك أبوي يحب وطن ما عندة جام !..

وأمي ملفوفة بعلّگ أخضر قديم وتعشگ الكاظم أمام..

وكلة حب..

يل تعيش وتكبر بسرداب أسود ليش رايد تدفن أحلامي بظلامك؟!

ليش تجبرني أعيش ملثم بديرة أيامك..

ليش رايد تخنگ أحلامي بَأحلامك..

(الله واحد)

وهو أمامي نفسه أمامك..

والرسول يحبنة كلنا وماهو واحد من عمامك!

وهو مو صوچ الوكت خلّاك سجينة بلهاتي..

هو مو صوچ الوكت من شگّگّت بيدك حياتي..

هذا حظ الفقرة جابك !!

ليش يومية أموت بعز شبابي وليش يومية تعيش بعز شبابك..

ليش رايد إندفن شجرة بتّرابك..

أني افتح للشمس كل غبشة باب وانتَ كل غبشة تسد بوجهي بابك..

يلّي ما عندك صلح حتى وي ذاتك..

آني أمنيتي أشوف أطفال تضحك بالمدارس وأنتَ تنصب چادر بگعدة عشاير هاي قمة أمنياتك ..

من أكلك آني أحبك خل نعيش بدنيا ما بيها حروب ولا رصاص..

تگلي (أسكت آني آغاتك !)..

ليش ما عندك حلم وردي بحياتك ؟!

ليش خايف لا گذلتي أطّول وتخرّب صلاتك؟!..