حالة من التوتر والقلق تخيم على معظم العرائس قبل حفل الزفاف وذلك لأنها تجربة جديدة تعيشها المرأة مع شريك حياتها.. لذا قامت صفحة pure lifestyle على موقع التواصل الاجتماعى فيس بوك بنشر مجموعة من النصائح للعروس قبل حفل الزفاف والتي تساعدها في التخلص من القلق والتوتر.
1- ياريت تعرفي تخلي الحنة قبل الفرح بيومين عشان ليلة الفرح لازم تنامي بدري عشان تصحي مرتاحة ووشك يكون منور.
2- اكتبي في ورقة كل الحاجات اللي المفروض تعمليها يوم الفرح عشان ماتنسيش حاجة مهمة وعشان تتخلصى من الفكرة المشهورة.. نسيت إيه؟؟؟ هو أنا نسيت إيه ها؟ ها ها نسيت إيه؟ أنا حاسة إني ناسية حاجة .. وخلي أختك أو صاحبتك تتابعها معاكي.
3- مهم جدا إنك تفطري الصبح فطار يكون فيه بروتين وألياف زى شريحتين فراخ بانيه أو مشويين مع توابل خفيفة أو ممكن شريحتين كبدة وسلطة .. الحاجات دى هتديكى إحساس بالشبع لمدة طويلة وكمان هتديكي طاقة.
4- مفيش حاجة أهم في اليوم دا من فرحك عشان كدا انسي التليفون خالص ومش لازم تغيري صورة البروفايل اليوم دا خالص على فكرة اديه لحد من صحباتك أو اختك وهو يرد على المكالمات ويقولك لو في حاجة مهمة دا لو فيه.. مافيش أهم من فرحك قولنا.
5- بصي! إن الكعب بتاع الشوز بتاعك يتكسر دي حاجة ممكن تحصل بنسبة 1% بس لو في حد عينه وحشة هتحصل عشان كدا خلي معاكي شوز احتياطي عشان لو حصل حاجة وكمان متنسيش تجربي الشوز قبل الفرح وتتعودي على المشية بتاعته خصوصا لو كنتي أول مرة تلبسي كعب عالي.
6- ظبطي قائمة الأغاني انتي وعريسك من قبلها بفترة عشان ال DJ ميشغلش حاجة مش على مزاجكم وتقفوا تبصوا لبعض.
7- في حاجات كدا المفروض تبقى معاكي زي الإبرة والخيط والحاجات الضرورية دي زي أدوية الصداع مثلًا.
8- طبعا إنتي مش كل يوم هتكوني عروسة عشان كدا ماينفعش اليوم دا ماتتصوريش كتير جدا بابا وماما وإخواتك خدي معاهم صور كتير وفرحيهم.
9- متخافيش من كم الناس اللي بيبصوا عليكي ولا تشغلي بالك برأي الناس في فستانك أو الميك أب اهدي.. اقفي كدا وخدي نفس عميق واهدي عشان ماتتوتريش.. بصي.. ركزي في عريسك.
10- لو هتجيبي فوتوجرافر.. ظبطي مع عريسك من قبل الفرح شكل الصور اللي عايزين تعملوها وقولوا للفوتوجرافر عليها عشان الصورة تعجبكم.
